Alþjóðadagur móðurmálsins

Móðurmálsvikan 21.-28. febrúar 2014

Árið 1999 staðfesti UNESCO að 21. febrúar ár hvert skyldi vakin athygli á þýðingu móðurmálsins fyrir einstaklinga og mikilvægi þess fyrir menningu þjóða. Sjá nánar á heimasíðu UNESCO, hér.

Íslenska UNESCO-nefndin og Stofnun Vigdísar Finnbogadóttur í erlendum tungumálum hafa ákveðið að efna til nokkurra viðburða í vikunni 21.-28. febrúar í tilefni Alþjóðadags móðurmálsins. Leitað hefur verið eftir samstarfi við fjölmarga aðila, m.a. Móðurmál – Félag tvítyngdra barna, Kennarasamband Íslands, Reykjavíkurborg og fleiri aðila, sem hafa látið sig þennan málaflokk varða.

Í tilefni þessa dags í ár verður vakin athygli á starfi fjölmargra aðila sem tengjast ólíkum móðurmálum, hvatt til umræðu í skólum um hvernig sé hægt að koma til móts við nemendur sem tala annað móðurmál en íslensku og myndböndum um efnið komið á framfæri. Efnt verður til samvinnu við skóla um allt land sem felur í sér skráningu einstakra bekkja á tungumálaforða sínum, og haldinn verður sérstakur fyrirlestur um ólík móðurmál í skólakerfinu. Móðurmálsvikunni lýkur með málþingi í Norræna húsinu, föstudaginn 28. febrúar, kl. 15–17.

Mikil menningarleg verðmæti felast í ræktun móðurmálsins sem auðgar samfélag fólks og tengir saman ólíka menningarheima, bæði innan samfélags og á milli þeirra. Menning á Íslandi býr nú þegar yfir mikilli fjölbreytni og á hverjum degi eru í skólanum börn sem eiga sér fjölmörg ólík móðurmál. Í þessum ríkulega tungumálaforða okkar felast verðmæti sem okkur ber bæði að hlúa að og virða. Dagur móðurmálsins á að minna á það og vera okkur hvatning til að styrkja stöðu móðurmála.

Íslensk málnefnd hvatti til aðgerða svo tryggja mætti sem best stöðu barna sem hafa ekki íslensku að móðurmáli í ályktun sinni (hér) á degi íslenskrar tungu 2013.

Eitt af meginverkefnum Stofnunar Vigdísar Finnbogadóttur er einmitt að stuðla að fjöltyngi og menningarlegum fjölbreytileika. Árið 2013 voru staðfest sérstök tengsl hennar við UNESCO með tilkomu alþjóðlegrar tungumálamiðstöðvar, þar sem rétturinn til móðurmálsins verður í brennidepli. Þá má geta þess að á fyrstu ráðstefnu UNESCO í tilefni Alþjóðadags móðurmálsins var Vigdís sérstakur málsvari móðurmálsins (sjá hér).

Sjá nánar á heimasíðum www.unesco.is og www.vigdis.hi.is

Með bestu kveðjum,

Jón Torfi Jónasson                         Auður Hauksdóttir
Íslensku UNESCO-nefndinni            Stofnun Vigdísar Finnbogadóttur

SVF

 

 

 

 

 

 

 

Sjá myndbönd sem útbúin voru í tilefni Alþjóðlega móðurmálsdagsins.

Sjá dagskrá Móðurmálsvikunnar 21.-28. febrúar 2014.

Ávarp Irinu Bokovu, aðalframkvæmdastjóra UNESCO, í tilefni af Alþjóðlega móðurmálsdeginum.

Fjölmiðlaumfjöllun.

Sjá upptöku af fyrirlestri Bergþóru Kristjánsdóttur.

Sjá upptöku af málþinginu Móðurmál - mál málanna í Norræna húsinu.

Þú ert að nota: brimir.rhi.hi.is