Veröld – hús Vigdísar opið

Veröld – hús Vigdísar var opnað formlega þann 20. apríl 2017, á sumardaginn fyrsta. Húsið er helgað kennslu í erlendum tungumálum við Háskóla Íslands og starfsemi Vigdísarstofnunar – alþjóðlegrar miðstöðvar tungumála og menningar. Það er staðsett á horni Suðurgötu og Brynjólfsgötu, og stendur við Brynjólfsgötu 1. Húsið er opið alla virka daga. 
 
Í Veröld eru Stofnun Vigdísar Finnbogadóttur í erlendum tungumálum og Vigdísarstofnun – alþjóðleg miðstöð tungumála og menningar staðsettar. Þar er aðstaða fyrir kennslu og rannsóknir í erlendum tungumálum, auk þess sem aðstaða er fyrir fyrirlestra-, ráðstefnu- og sýningarhald. Í Veröld er einnig sýningarsalur og Vigdísarstofa, rými sem er sérstaklega helgað kjöri Vigdísar Finnbogadóttur sem forseta Íslands þann 29. júní 1980. Fyrsta sýningin í sýningarsal hins nýja húss er einnig helguð störfum og hugðarefnum Vigdísar Finnbogadóttur, en hún er helsti hvatamaður hússins. Sýningin nefnist „SAMTAL – DIALOGUE“ og þar er fjallað í máli og myndum um störf og hugðarefni Vigdísar. Þar eru á sýningu munir í eigu Vigdísar, sem hún lánaði til sýningarinnar. 
 
Vigdís Finnbogadóttir og Jón Atli Benediktsson á svölum Vigdísarstofu.
Við opnun hússins var slegið upp menningarveislu tengdri tungumálum undir yfirskriftinni „Tungumál ljúka upp heimum“.
 
Þar komu fram fjölmargir innlendir listamenn og kórar sem fluttu tónlist og önnur verk á ótal tungumálum. Auk þess ávörpuðu samkomuna þau Vigdís Finnbogadóttir, fyrrverandi forseti Íslands og velgjörðarsendiherra tungumála hjá UNESCO, Irina Bokova framkvæmdastjóri UNESCO, Guðni Th. Jóhannesson, forseti Íslands, Rigmor Dam, mennta- og menningarmálaráðherra Færeyja, Auður Hauksdóttir, forstöðumaður Stofnunar Vigdísar Finnbogadóttur, Jón Atli Benediktsson, rektor Háskóla Íslands, Mònica Pereña, forseti Linguapax International, og Auður Ava Ólafsdóttir, rithöfundur og forstöðumaður Listasafns Háskóla Íslands. 
 
Að lokinni hátíðardagskránni var gengið að nýju byggingunni, þar sem Vigdís og Jón Atli buðu gesti velkomna. 
 
Þú ert að nota: brimir.rhi.hi.is