Veröld - hús Vigdísar

Veröld - hús Vigdísar var vígt á sumardaginn fyrsta, þann 20. apríl 2017. 

Hægt er að heimsækja húsið mánudaga til laugardaga milli 11 og 16. Þar er hægt að fræðast um Vigdísi Finnbogadóttur, um húsið og arkítektúrinn og um starfsemina í Veröld, sem er hús tungumála. Hægt er að fá sérstaka leiðsögn um húsið klukkan 13 og 15 á daginn, og einnig eftir samkomulagi. Almennt er tekið 900 króna gjald fyrir leiðsögnina. 

Í húsinu hefur verið opnuð sýning um líf og störf Vigdísar, en sýningin nefnist SAMTAL - DIALOGUE. 

Á sýningunni er sagt frá námsárum Vigdísar erlendis og starfi hennar sem frönskukennari, leiðsögumaður og síðar leikhússtjóri Leikfélags Reykjavíkur 1972-1980. Gerð er grein fyrir fjölbreyttu hlutverki hennar sem forseti Íslands árin 1980-1996 og öllu því góða starfi sem hún hefur unnið eftir að forsetatíð lauk, m.a. sem velgjörðarsendiherra tungumála á vegum UNESCO - mennta-, vísinda- og menningarstofnunar Sameinuðu þjóðanna og sem öflugur liðsmaður Stofnunar Vigdísar Finnbogadóttur í erlendum tungumálum. 

Í sýningunni fáum við jafnframt innsýn í hugðarefni Vigdísar, sjáum nokkrar eftirlætisbækur hennar, tilvitnanir og kvæði og getum fylgst með vexti Vinaskógar í Þingvallaþjóðgarði, sem stofnaður var henni til heiðurs. Gestir eru hvattir til að taka beinan þátt í samtalinu við Vigdísi, setjast á bláu leikhússtólana og hugleiða hugtök á borð við heiðarleiki, mannréttindi, menning, þekking, jafnrétti, tungumál, framfarir, víðsýni og menntun. 

Fyrir fyrirspurnir um Veröld og um leigu á sölum má hafa samband á verold@hi.is

 

 

Þú ert að nota: brimir.rhi.hi.is