Útgáfu bókarinnar Languages Open up Worlds – Words for Vigdís verður fagnað með útgáfuhófi í Veröld – húsi Vigdísar fimmtudaginn 5. desember kl. 16:30. Bókin er ensk þýðing bókarinnar Tungumál ljúka upp heimum – Orð handa Vigdísi.

Ásdís R. Magnúsdóttir, ritstjóri bókarinnar og formaður stjórnar Vigdísarstofnunar, kynnir bókina. Auður Ava Ólafsdóttir rithöfundur les sinn texta úr bókinni og Vigdís Finnbogadóttir áritar. Boðið verður upp á léttar veitingar.

Hægt verður að kaupa allar þrjár útgáfur bókarinnar á staðnum, íslensku, dönsku og ensku. Eintakið kostar 3.500 krónur á tilboðsverði.

Strax í kjölfar útgáfuhófsins verður hátíðarsamsöngur Café Lingua – Heimsins jól, haldinn í Veröld.

Verið velkomin í notalega stund í Veröld – húsi Vigdísar á aðventunni.

Café Lingua er í hátíðarskapi í desember og blæs til jólasamsöngs. Múltíkúltíkórinn, undir stjórn Margrétar Pálsdóttur, fær gesti til að syngja með sér jólalög á ýmsum tungumálum í Veröld – húsi Vigdísar fimmtudaginn 5. desember. Dagskráin hefst kl. 17.30. Sungið verður á arabísku, dönsku, ensku, frönsku, íslensku, króatísku, lúganda, norsku, portúgölsku, pólsku, serbnesku, slóvakísku, spænsku, sænsku, tagalog, þýsku og jafnvel fleiri málum.

“Café Lingua – lifandi tungumál” er tungumálavettvangur á vegum Borgarbókasafnsins í samstarfi við ýmsa aðila í samfélaginu. Eitt af markmiðum Café Lingua er að virkja þau tungumál sem hafa ratað til Íslands með fólki hvaðanæva að og auðgað mannlíf og menningu ásamt því að vekja forvitni borgarbúa á heiminum í kringum okkur. Café Lingua er gátt inn í mismunandi tungumála – og menningarheima og tilvalinn vettvangur fyrir þá sem vilja efla tungumálakunnáttu sína og hafa áhuga á að spreyta sig á hinum ýmsu tungumálum. Aðgangur er ókeypis og allir velkomnir.

Nánari upplýsingar væntanlegar.