Nýjustu fréttir

Ráðstefna sérfræðinga á Norðurlöndunum í ítölskum fræðum

Stofnun Vigdísar Finnbogadóttur í erlendum tungumálum við Háskóla Íslands, í samvinnu við sendiráð Ítalíu í Osló, stendur fyrir ráðstefnu sérfræðinga á Norðurlöndunum í ítölskum fræðum dagana 13.-14. júní.

Aðalfyrirlesarar verða Maurizio Dardano, fyrrverandi prófessor við Università degli Studi di Roma III, og Roberto Gigliucci, prófessor við Sapienza Università di Roma. Aðrir fyrirlesarar á ráðstefnunni eru háskólakennarar í ítölsku máli, bókmenntum og málvísindum á Norðurlöndunum, þar á meðal Stefano Rosatti, lektor í ítölsku við Háskóla Íslands og Michele Broccia, sendikennari í ítölsku við Háskóla Íslands. Fyrirlestrarnir fara fram á ítölsku.

Ráðstefnan verður haldin í fyrirlestrasal Landsbókasafns Íslands – Háskólabókasafns frá kl. 09:30-16:30 dagana 13.-14. júní. Aðgangur er ókeypis og öllum heimill.

Sjá nánar á heimasíðu ráðstefnunnar www.conference.hi.is/xcis/

Háskólinn í Bergen styrkir Stofnun Vigdísar Finnbogadóttur

Háskólinn í Bergen hefur gefið vilyrði um styrk til alþjóðlegu tungumálamiðstöðvarinnar, sem mun starfa innan vébanda Stofnunar Vigdísar Finnbogadóttur í erlendum tungumálum við Háskóla Íslands. Framlag skólans mun nema rúmum 10 milljónum króna. Greint var frá þessari ákvörðun í heimsókn Vigdísar Finnbogadóttur til Bergen þar sem hún var heiðursgestur við opnun Festspillene ásamt Hadiu Tajik, menningarmálaráðherra Noregs, og Jens Stoltenberg forsætisráðherra.
Í apríl sátu Vigdís Finnbogadóttir og Auður Hauksdóttir, forstöðumaður Stofnunar Vigdísar Finnbogadóttur, fyrsta fund samstarfsnets fulltrúa Háskóla Íslands, Háskólans í Bergen, Tækniháskólans í Þrándheimi (NTNU),  Nýnorsku menningarmiðstöðvarinnar og fylkisstjórnar Hörðalands, en þessir aðilar hafa undirritað viljayfirlýsingu um rannsóknasamstarf. Yfirlýsingin byggist m.a. á Norrænu tungumálayfirlýsingunni frá 2006 og hefur það að markmiði að auka samvinnu um rannsóknir á vestnorrænum tungumálum og menningu. Efnt var til fundarins í tengslum við ráðstefnu, sem haldin var í minningu Ivars Aasen, sem lagði grunninn að nýnorsku, en í ár eru liðnar tvær aldir frá fæðingu hans. Vigdís Finnbogadóttir hélt hátíðarræðu á ráðstefnunni.
Í bréfi Sigmund Grønmo, rektors Háskólans í Bergen, til Stofnunar Vigdísar Finnbogadóttur segir að í Háskólanum í Bergen sé fylgst af áhuga með undirbúningi alþjóðlegu tungumálamiðstöðvarinnar og að mikill stuðningur sé við verkefnið.  Hann lætur í ljós von um að  tungumálamiðstöðin geti sem fyrst orðið að veruleika og árnar Stofnun Vigdísar allra heilla og færir fram  óskir um  farsælt samstarf í framtíðinni.  
Auður Hauksdóttir segir að stórhugur Háskólans í Bergen beri vott um ríkan áhuga norskra fræðimanna á samstarfi við Stofnun Vigdísar og væntingar um að alþjóðlega tungumálamiðstöðin verði þróttmikil og öflug. 

Mynd: Kristján Logason.

Myndir af Guðbergsþingi og fjölmiðlaumfjöllun

Málþing til heiðurs Guðbergi Bergssyni var haldið í Hátíðasal Háskóla Íslands laugardaginn 1. júní. Skáld, þýðendur og fræðimenn komu hvaðanæva að úr heiminum til að heiðra rithöfundinn og þýðandann Guðberg. Íslenskir rithöfundar og fræðimenn ræddu um tengsl sín við skáldið. Við þetta tækifæri var Guðbergur sæmdur heiðursdoktorsnafnbót við Deild erlendra tungumála, bókmennta og málvísinda við Háskóla Íslands.

Sjá myndir og fjölmiðlaumfjöllun um málþingið og heiðursdoktorsathöfnina.