Á sýningunni Mál í mótun í Veröld – húsi Vigdísar fá gestir tækifæri til að skyggnast inn í heim tungumálanna og kynnast hinum ýmsu tungumálum sem töluð eru í dag, allt frá gríðarstórum heimsmálum til fámennistungumála í útrýmingarhættu. Við fræðumst um hinar fjölmörgu hliðar tungumála með hjálp gagnvirkra margmiðlunarverka og heyrum raddir á þeim ólíku málum sem töluð eru á Íslandi í dag. Við sjáum hvernig tungumál hafa þróast samhliða sögu mannsins á jörðinni í meira en 300.000 ár og hvernig þau hafa dreifst og flakkað heimshorna á milli. Loks kynnumst við lífshlaupi tungumála sem, líkt og önnur lifandi fyrirbæri, verða til, þróast og taka breytingum áður en þau loks deyja út. Þá veltum við fyrir okkur hvernig hægt er að stuðla að varðveislu tungumála svo að þau geti dafnað um ókomna tíð.

Sýningin Mál í mótun var sett upp á vegum Vigdísarstofnunar - alþjóðlegrar miðstöðvar tungumála og menningar í samstarfi við andrúm arkitekta og Gagarín. Hún er hluti af framlagi stofnunarinnar til Alþjóðlegs áratugar frumbyggjatungumála sem Sameinuðu þjóðirnar ýttu formlega úr vör árið 2022.

Við bjóðum skólahópum að heimsækja sýninguna alla virka daga skólaársins (jan-maí og sep-nóv). Markhópur sýningarinnar eru nemendur á aldrinum 10-19 ára en tekið er á móti öðrum aldurshópum eftir samkomulagi. Kennsluvefur hefur verið settur upp fyrir sýninguna þar sem kennarar geta sótt verkefni sem hægt er að vinna með nemendum fyrir og eftir heimsókn og annað ítarefni í tengslum við tungumál. Bókið heimsókn hér.