Vigdísarstofnun – alþjóðleg miðstöð tungumála og menningar hefur aðsetur í Veröld – húsi Vigdísar. Miðstöðin er starfrækt undir merkjum UNESCO, Menningarmálastofnunar Sameinuðu þjóðanna og er undirstofnun Stofnunar Vigdísar Finnbogadóttur í erlendum tungumálum við Háskóla Íslands.

Alþjóðleg miðstöð tungumála og menningar hóf störf sumardaginn fyrsta 2017 þegar Veröld – hús Vigdísar var formlega tekin í notkun. Innan miðstöðvarinnar er staðið fyrir ráðstefnum, málþingum, fyrirlestrum, rannsóknum, kvikmyndasýningum, námskeiðum, fundum, sýningum og fræðslu um tungumál í víðu samhengi, sem þjóna þeim markmiðum sem koma fram í samstarfssamningi Ríkisstjórnar Íslands og UNESCO frá 2013: 

Helstu markmiðin eru að:

• stuðla að fjöltyngi til að auka skilning, samskipti og virðingu milli menningarheima og þjóða;
• auka vitund um mikilvægi tungumála sem grunnþáttar í menningararfleifð mannkyns;
• stuðla að þýðingum og þýðingarannsóknum og athugunum og greiningu á þýðingaflæði;
• vinna að varðveislu tungumála og vöktun á málstefnu og málstýringu á sviði tungumála með fjöltyngi að leiðarljósi;
• stuðla að rannsóknum og menntun í erlendum tungumálum og menningu;
• styðja við og stuðla að rannsóknum á móðurmálum sem hluta af almennum mannréttindum.

Helstu áherslur í starfi Vigdísarstofnunar fyrsta áratug starfseminnar eru eftirfarandi:

• Vistfræði tungumála á Vestur-Norðurlöndum, þ.e. sambýli tungumála og tengsl tungumála og menningar á vesturströnd Noregs, í Færeyjum, á Íslandi og Grænlandi.
• Frumbyggjatungumál, fámennismál og lítil málsvæði, í tengslum við Alþjóðlegan áratug frumbyggjatungumála 2022-2032 (IDIL 2022-2032) í samvinnu við UNESCO.
• Bókmenntir, tungumál og menning Rómafólks víða um heim, í tengslum við rannsóknarnetið Roma in the Centre.
• Tungumálasýningin Mál í mótun, þar sem gestum gefst kostur á að kanna ýmis tungumál heimsins og fræðast um lífshlaup þeirra.